Ձեր տուն մտնի հազար բարի,
Հաճար, ցորեն, կորեկ, գարի,
Լիքը խորեր շատ ունենաք,
Կարմիր օրեր շատ ունենաք,
Կարմիր օրով, կարմիր շորով,
Ուրախ կենաք` լիքը տնով:
Ձեր կարասնին լեցվին գինով, ավետիս,
Ձեր խորոզնին կանչեն ձենով, ավետիս,
Ձեր ճուկն ու թաս երթան ու գան, ավետիս,
Ծառ խընկենի, արմավենի, ավետիս,
Ձեր մանչերուն Աստված օրհնե, ավետիս:
Ահա եկավ Նոր տարի,
Հետը բերավ նոր բարի,
Մանր տղոց ուրախ օր,
Բարի զավակ հորն ու մոր:
Բարով եկար Նոր տարի,
Տուր մեզի ցորեն, գարի,
Այգուն, բաղջին պտուղ տուր,
Հիվանդություն թող չըլնի,
Ապրիք շատ ու շատ տարի:
Հինը գնաց, նորը կուգա,
Հինը ուրախ ճանապարհեք,
Նորն էլ լիքը բարիք կուտա:
Առատ տարի, բերքը` բարի:
Դուռ, լուսամուտ բացեք,
Ինչ ուզում եք խնդրեցեք:
Ահա եկավ Նոր տարի,
Հետը բերավ նոր բարի:
Շնորհավոր Նոր տարի, Ձեր տունը շեն ըլնի, Բարով նոր հագնեք, Միշտ ուրախ լինեք:
Հացը բոլ ըլնի, Աչքը կուշտ ըլնի, Ձեզ էլ փայ ըլնի, Մեզ էլ փայ ըլնի:
Բարին վեր գա, ձեզ հետ նստի,
Բարով թող գա ձեր Նոր տարի,
Մուրազներդ թող կատարի:
Բարեմաղթանքներ
Շնորհավոր ձեր Նոր տարին, առատ, ուրախ, անկորուստ տարի լինի, բարով հասնեք մեկ էլ էս օրվան, առողջ, երջանիկ լինեք:
Շնորհավոր Նոր տարի, ամէն տարի ուրախ, բարով, խերով շատ տարիներ էս օրս հասնիք:
Ուրախության տարի լինի, ցամաք աչքով, ուրախ սրտով ամեն տարի էս օրվան հասնիք:
Ուրախությամբ տարեմուտ ենք անում, ուրախությամբ էլ սուրբ Հարությանը արժանանանք, լի ու առատ լինի, Աստված մահին թանգություն տա, հացին՝ էժանություն:
Տունը շեն ըլնի, բարաքաթ ըլնի,
Միշտ ջոմարդ լինեք,
Մեզ էլ միշտ հիշեք:
Շնորհավոր Նոր տարի:
Օրհնանքներ
Հացիկ, ջրիկ – կյանք երջանիկ:
Օրհնվեք, ձեր օջախը շեն մնա, ձեր մինը հազար դառնա:
Շեն մնաք, ծլեք, ծաղկեք, զորանաք:
Օրհնյալ լինեք, յոթը որդով սեղան նստեք:
Հիվանդություն թող չլնի, ապրեք շատ ու շատ տարի:
Ոտքերդ քարին չդիպչի, երկար արև ձեզ:
Չոլը գնաք՝ կանաչ դառնա, Աստծո աջը ձեր գլխից անպակաս լինի:
Ջրի նման երկար կյանք ունենաք, ուրախ օրով ծերանաք:
Օրհնյալ է Աստծո օրհնանքը, Աստծո խաչը միշտ ձեր վրա լինի:
Բախտավոր ապրեք, ձեր տան ծուխը վառ մնա:
Երկար արև լինեք, մազներդ չծռվի:
Հող ցանեք, ոսկի հնձեք:
Օրհնվի ձեր յոթը պորտը:
Ծլեք, ծաղկեք, ծիր – ծիրանի դառնաք:
Ձեր կերածդ հացը հալալ լինի, հացով մնաք:
Տաշտներդ լի հաց լինի, դռներդ միշտ բաց լինի:
Ծլեք, ծաղկեք, զորանաք, ձեր կերածդ հացը հալալ լինի: